SK7 er sérbýli fyrir fimm manna fjölskyldu í Garðabæ. FORMER arkitektar sáu um heildræna hönnun hússins, hönnun húss, innanhúss- og lóðarhönnun í samstarfi við Ólaf Melsted landslagsarkitekt.
Hugmyndafræðin
Húsið er lokað að götu tll að skapa næði fyrir íbúa en opnar sig í suður og vestur til að fanga sól og útsýni. Húsið er skipulagt í kringum skjólgóðan og sólríkan inngarð. Öll alrými í húsinu umlykja garðinn og stórir gluggafletir allan hringinn gera mörkin óljós a milli inni og útisvæðis.
Um leið og gengið er inn í húsið blasir við sterkur sjónás í gegnum húsið að útbyggðum glugga sem fangar útsýni til bæjarins.
Hjarta hússins
Eldhúsið er hjarta hússins og opnast beint út að inngarði en er jafnframt í tengingu við minni inngarð þar sem morgunsólar gætir. Arinn brýtur upp alrýmið og stofa þrepast niður til að skapa rými innan rýmis.
Húsið er fágað og látlaust og vandað í öllu efnisvali með tilliti til endingagóðra efna.
Allar innréttingar eru sérhannaðar með þarfir eiganda að leiðarljósi af arkitektum.
